ВОПРОС - ОТВЕТ !!!

На этой страничке мы отвечаем на Ваши вопросы.
Спрашивайте !
Если Вам известен другой ответ 
направьте его нам !

Где можно найти акафист  Иисусу Воскресшему . Припев приблизительно такой:  'Господи Иисусе Христе воскреси души наши'

 О Т В Е Т:

Он называется Воскресению Христову (синодальный):

Акафист
Воскресению Христову

Кондак 1

Возбранный Воеводо и Господи, вечныя смерти победителю, яко избавлься от духовнаго умерщвления, похвальная восписую Ти, возсозданный Тобою раб Твой. Ты же яко имеяй победу над смертию, от смерти греховныя свободи нас, зовущих: Иисусе Воскресший, воскреси души наша.

Икос 1

Ангелы воскресение Твое, Христе Спасе, непрестанно поют на небеси, и нас на земли сподоби чистым сердцем воспети Тебе сице: Иисусе непостижимый, всех верных просвещай, просвети и мя заблуждшаго. Иисусе Воскресший, всех собою оживляяй, оживи мя умерщвленнаго грехами. Иисусе, на небо вознесыйся и возносяй на Тя надеющихся, совознеси и мя, долу преклоннаго. Иисусе, седяй одесную Отца и разделяй славу с любящими Тя, не лищи мя славы Твоея. Иисусе, хотяй приити судити живым и мертвым не осуди мя по делом моим, но сотвори со мною по милости Твоей. Иисусе Воскресший, воскреси души наша.

Кондак 2

Видя падших человеков, Господи, Ты вочеловечився совоскресил еси всех и, воскресив, даровал вся потребная ко спасению: сице и мене умервщленнаго грехми оживи, зовуща: Аллилуиа.

Икос 2

Разум не постигает тайны Божественныя како источник жизни воскресает, умервщляя смерть. Сего ради точию сердцем испытующе радость воскресения и тою просвещаемы со гласом веселия духовнаго взываем Ти сице: Иисусе, входяй дверем заключенным, вниди в дом души моея. Иисусе, сретивый ученики на пути, срящи и мя на пути сей жизни. Иисусе, воспламенивый сердце их Твоими словесы, воспламени и мое хладное сердце. Иисусе, давый Себе познати в преломлении хлеба, даждь ми познати Тя в Божественней Евхаристии. Иисусе, обещавый Духа Святаго ученикам Твоим, ниспосли и мне сего Духа Утешителя от Отца. Иисусе Воскресший, воскреси души наша.

Кондак 3

Силою Божественною воскресивый Лазаря, воскреси и мене истлевшаго страстьми и многолетно лежащаго во гробе нераскаяния, да востав по гласу Твоему воспою спасаемый: Аллилуиа.

Икос 3

Имеяй власть над смертию из ада души вызвал еси, Иисусе. Воззови и мене из глубины греховныя, да и аз очистив чувствия блистающу Ти во свете неприступнем радостно воспою победную песнь тако: Иисусе, смерти победителю, победи моя злыя страсти. Иисусе, жизни подателю, даждь ми жизнь спасительную. Иисусе, источниче радости, возвесели сердце мое во истине Твоей. Иисусе, пятью хлебы пять тысящ насытивый, хлебом небесным напитай мя. Иисусе, надеждо падших, изми мя из рова зол моих, Иисусе Воскресший, воскреси души наша.

Кондак 4

Буря страстей смущает и потопляет мя, но молю Тя, Иисусе, яко Петру простри ми руки помощи и силою воскресения Твоего воздвигнув мя, научи воспевати: Аллилуиа.

Икос 4

Слышаще радостную весть воскресения Твоего, Иисусе, небеса достойно веселятся, земля же радуется. И мы празднующе вечное веселие дерзаем взывати Тебе сице: Иисусе, седяй во свете неприступнем, буди доступен всем по милосердию Твоему. Иисусе, любяй создания Твоя, не забуди и меня последняго. Иисусе, влекий к Себе сердца, смягчи и мое окаянное сердце. Иисусе, вся благая прошения исполняяй, исполни и мое прошение во еже паче всего любити Тя. Иисусе, всякую каплю слезную приемляй, не отрини моих молений. Иисусе Воскресший, воскреси души наша.

Кондак 5

Богоприятная жизнь источается от Тебе, о, Иисусе, Сыне Бога Живаго. Сего ради молю Тя, да не погубит мя человекоубийца и да не заградит уста моя, вопиющая Тебе: Аллилуиа.

Икос 5

Видевше духом воскресшаго Господа, приидите пиво пием новое, не от камене истекшее, но от источника нетленнаго и живоноснаго гроба Спасителя, имже безплодную землю душ наших одождив, научи всех пети Ему сице: Иисусе, напаяй нас Своею Кровию, даруй мне неоскудноприимати Пречестную Кровь сию, Иисусе, низпосылаяй дождь на праведныя и грешныя, ороси и мя к плодоношению духовному. Иисусе, не возгнушавыйся грешницы покаявшейся, даждь и мне нозе Твои омыти слезами благодарения. Иисусе, рекший Фоме: блажени не видевшии, но веровавшии, даждь ми веру нелицемерную. Иисусе, рекий: ищите и обрящите, даруй ми обрести Тя единаго на потребу. Иисусе Воскресший, воскреси души наша.

Кондак 6

Проповедуяй в дусе неумолкающаго радования Твое живоносное воскресение, Иисусе, Боже мой, да буду и аз грешный причастник сего воскресения, поя Тебе непрестанно в горнем Иерусалиме: Аллилуиа.

Икос 6

Возсиявый всему миру воскресением Своим Господь, Иисус Христос, ныне вся исполняет света: небо же и земля и преисподняя, да празднует убо вся тварь Христово возстание, в немже утверждаемы вопием сице: Иисусе, вся исполняяй светом Твоим, прсвети и мои омраченныя очи. Иисусе, небо с землею сочетавый, возведи мя от земли на небо. Иисусе, снизшедый светом Божества в преисподняя, сниди в преисподнюю души моея. Иисусе, изведый из темниц адовых ожидавших Тя души, изведи и мя грешнаго из мрака уныния, яко живот мой аду приближися. Иисусе, всем простираяй пречистыя руце Твоя, объими и мя окаяннаго. Иисусе Воскресший, воскреси души наша.

Кондак 7

Хотяй открыти силу Божества своего. Господь покрывается печатию Каиафы, да не нарушив оныя пред стрегущими победоносно возстанет и научит пети: Аллилуиа.

Икос 7

Дивно и непостижимо есть, како вчера спогребшийся Тебе, Христе, днесь совозстаю духом Тебе воскресшему и воспеваю тако: Иисусе воскресший, всем туне жизнь подаваяй, окрили ум мой, да Тебе последствует. Иисусе, освятивый землю Твоими стопами, освяти мысль мою, к Тебе возносящуюся. Иисусе, не возбранивый начертати пречистый образ Твой, даждь и мне имети выну в душе моей образ Твоего воскресения. Иисусе, приявый две лепте вдовицы, приими от меня песнь сию. Иисусе, не осудивый блудницы, но на путь истины наставивый ю, не осуди и моих нечистых уст в песнопении Тя лобызающих. Иисусе Воскресшщий, воскреси души наша.

Кондак 8

Странно Бога вочеловечшася и воскресша мысленно видяще всякое житейское отложим попечение, яко да Царя всех подымем и воспоем Ему: Аллилуиа.

Икос 8

Весь, был еси любовь к падшим человекам о, Иисусе, и поставил еси на Божественней страже Богоглаголиваго Аввакума, да покажет светоноснаго Ангела, ясно глаголюща о воскресении Твоем. Темже и мы зовем Тебе сице: Иисусе, стрегомый воинами, посли паки Ангела Хранителя на стражу души моея, его же аз отгоняю грехи моими. Иисусе, ослепивый очи стрегущим Тя блистанием Божества, отврати очи моя от суеты и просвети к познанию истины. Иисусе, вопрошавый Апостола Петра: любиши ли Мя, даждь мне имети образ любви его. Иисусе, простивый тому Апостолу отречение, прости и мене ежечасныя отречения от повелений Твоих. Иисусе, давый власть вязати и решити, разреши мя от неправд моих. Иисусе Воскресший, воскреси души наша.

Кондак 9

Все естество человеческое Тобою восприятое прославися воскресением Твоим, Иисусе, и сего ради даруеши телесам нетление. Темже мы видяще сие знамение в останках святых вопием со умилением: Аллилуия.

Икос 9

Ветия богоглаголивая утреннеют духом сретая Тя исходяща из гроба и вместо мира принося Ти песнь, яко Солнцу правды и Владыце, с ними же наша молитвы приими сицевая: Иисусе, приемый миро на Тя излиянное, приими и мною излиянное славословие. Иисусе, Солнце истины, просвети душу мою. Иисусе, рыбари соделавый ловцами человеков, улови и мою злую волю в Твое послушание. Иисусе, из Савла соделавый первоверховнаго Апостола, вразуми и мя заблудшаго. Иисусе, молитвами Апостола сего и всех святых Твоих, пощади мя грешнаго. Иисусе Воскресший, воскреси души наша.

Кондак 10

Спасти хотяй род человеческий, Иисусе, снизшел еси на землю и Бог сый восприял еси немощи наша да и в них явится сила Твоя подвизающая пети: Аллилуиа.

Икос 10

Царю воскресший, Иисусе Христе, Спасителю наш, Ты снизшедый в преисподняя земли и сокрушивый верий вечныя, содержащия связанныя души, свободи и мене от уз греха взывающа Тебе сице: Иисусе, вручивый возлюбленнаго ученика Матери Твоей, вручи и мя спасительному Ея смотрению. Иисусе, страдания Матери Твоея обративый в радость, даждь и мне окаянному терпеливо понести крест мой. Иисусе, давый мирови Заступницу Матерь Твою, даждь и мне грешному быти под кровом Ея. Иисусе, младенцем не возбранивый прикасатися к Тебе, даруй мне их незлобие. Иисусе, рекий блуднице: иди и отселе не согрешай, даждь ми к тому не прогневляти Тя. Иисусе Воскресший, воскреси души наша.

Кондак 11

Пение умиленное о воскресении Твоем даруй мне принести Тебе, о, Спасителю мой, и в нем да приимет душа моя елей исцеления от душевредных мечтаний и да поет выну Тебе: Аллилуиа.

Икос 11

Светоприимно от воскресения Твоего восприявши лучи благодати и чрез них яко в зерцале видяще духовно Твое живоносное востание покланяемся Кресту Твоему честному в святое воскресение Твое поем и славим сице: Иисусе, преклонивый небеса, приими поклонение наше благоутробно. Иисусе, уснувый плотию, яко мертвый, умертви наша плотския похоти. Иисусе, всего себе давый на спасение человеком, даждь и мне всецело предатися Тебе. Иисусе, возшедый на небеса уготовати место любящим Тя, всели и мя во обители Твоя. Иисусе, седый одесную Отца, десным овцам сопричти мя. Иисусе Воскресший, воскреси души наша.

Кондак 12

Благодать даждь и мне всех возлюбивый, Иисусе, и приими мое моление яко дань приносимая Тебе и отжени от души моея вся лукаваго помышления да неосужденно воспою Тебе: Аллилуиа.

Икос 12

Поюще Твое всеславное воскресение, величаем Тя о, Христе, Боже наш, и веруем яко даруеши всем живот вечный. Того ради в сей нареченный святый яко братия друг друга объимем, ненавидящим нас простим, вся воскресением и едиными усты и единым сердцем возопием Тебе тако: Иисусе, благославляя благославляющия Тя, благослови и ныне посильный труд мой. Иисусе, освящаяй на Тя уповающия, освяти желания и намерения моя. Иисусе, обещавый быти с верными до скончания века, пребуди неотлучно и со мною грешным. Иисусе, Слово ипостаси Отчей, очисти недостойное мое слово к Твоему песнопению. Иисусе, Пасха спасительная, от смерти к жизни преводящая, всели мя в чертог Твой просветив одеяние души моея. Иисусе Воскресший, воскреси души наша.

Кондак 13

О Иисусе Христе, смертию смерть поправый и сущим во гробех живот даровавый, приими в воню благоухания духовнаго сие малое моление наше и сущим нам во гробех нерадения даруй живот вечный да поем Тебе: Аллилуиа.
(Сей Кондак глаголи трижды. Таже Икос 1 и кондак 1).

Молитва первая

Господи Иисусе Христе, Боже мой, посещай тварь Свою, емуже явленый страсти моея и немощь естества нашего человеческаго и крепость супостата нашего: Ты Сам покрый мя от злобы его, зане сила его крепка, естество же наше страстно и сила наша немощна. Ты убо, о Благий, ведай немощь нашу и носяй неудобство безсилия нашего, сохрани мя от смущения помыслов и потопа страстей и достойна сотвори мя службы Твоея святыя, да не како в страстях моих растлю сладость ея и обрящуся безстуден пред Тобою и дерзостив: Господи, Пресладкий мой Иисусе, помилуй мя и спаси мя.

Молитва вторая

Владыко Господи Иисусе Христе Боже наш, Иже неизреченнаго ради Твоего человеколюбия наконец веков во плоти оболкийся от Приснодевы Марии, славим о нас Твое спасительное промышление, раби Твои, Владыко: песнословим Тя, яко Тебе ради Отца познахом: благословим Тя, егоже ради и Дух Святый в мир прииде: покланяемся Твоей по плоти Пречистей Матери, таковей страшней тайне послужившей: восхваляем Твоя ангельская ликостояния яко воспеватели и служители Твоего величествия: ублажаем Предтечу Иоанна Тебе крестившаго, Господи: почитаем и провозвестившия Тя пророки: прославляем апостолы Твоя святыя: торжествуем же и мученики, священники же Твоя славим, и покланяемся преподобным Твоим, и вся Твоя праведники пестунствуем: таковаго и толикаго многаго и неизреченнаго лика бо ественнаго в молитву приводим Тебе Всещедрому Богу раби Твои и сего ради просим нашим согрешениям прощения, еже даруй нам всех Твоих ради святых, изрядней же святых Твоих щедрот, яко благословен еси во веки веков
 . Аминь.

Д.Р.

26.05.03